My guy Fred Onyedinma no gree play small ball this weekend o! The Naija baller burst like thunder, score two clean goals wey ginger Wycombe Wanderers to knack Leyton Orient 4–1 for Adams Park.

E be like say dem no tell Orient say dem dey enter Wycombe turf — dem just collect woto-woto, na weytin hitvibz dey yan be dat.

Fred Onyedinma Dey On Fire – No Be Ordinary Form

From the first whistle, Fred no even wait make people siddon well. Just four minutes and the guy don waka free from offside trap like magician, slot am neat neat inside net — that one na him 50th career goal! See levels.

Leyton Orient try form hard guy as Aaron Connolly use penalty equalize, but Wycombe talk say “we no dey do draw here.”

Before anybody blink, Onyedinma don show again for 16th minute — low drive, keeper just dey look am pass. Two goals inside 20 minutes? Bros dey cook!

Wycombe fans dey dance shaku for stand, dem sabi say their team dey on a five-game unbeaten run now.

Later Dan Casey use him first goal for the club add small pepper for Orient wound, and Sam Bell come finish the matter late on — sharp rebound after McNeilly’s shot bounce out.

Fred Onyedinma Don Turn Beast Mode – Big Season Loading

Make we no lie — Fred don dey show say him get plan this season. Five goals, two assists in just 14 games? Last season e do 6+1 for 41 matches. You fit see say the boy don upgrade like Android.

One kain drama still happen o — Orient keeper Killian Cahill nearly finish Fred career small, collide with am one-on-one like say dem dey play rugby.

Referee just look away, no card, no pen, nothing. Na that one deny Fred him first hat-trick of the season. But no wahala — the brace still sweet like palmwine.

Wycombe dey climb table steady steady, and if Onyedinma continue this hot streak, e go hard to stop dem from entering promotion gist.

The guy dey play with confidence wey go make any defender reason retirement.

Na so o — Naija blood dey run things for England again!

You like this gist abi?
Oya, we go like hear from you. Help us drop small comment for the box below!