Omo, our guy Alex Iwobi don ginger the whole Super Eagles camp ahead of that big wahala match against Gabon for Rabat on Thursday.

Baba talk say confidence for camp don high like generator wey dem just service. All man dey reason say na time to show say Nigeria still dey among the football big boys for Africa, na weytin hitvibz dey yan be dat.

Alex Iwobi Talk Say Dem Fit Handle Gabon Matter

As e yarn with BBC Sport Africa, Iwobi no even form. E talk say this Gabon match no go be beans, but the belief for camp dey scatter roof.

According to am, every player don understand say this one no be friendly — na World Cup ticket dey line.

“I don go one World Cup before — Russia 2018,” e remind us. “And I wan go again. But first, we gats deal with Gabon. Even Aubameyang sef no wan miss am.”

You see that talk? Na confidence wey dey sweet belle. Iwobi still add say the match na perfect chance to wipe off the early wahala wey happen for qualifiers. So e be like redemption time for Naija boys.

Aubameyang Threat Still Dey, But Naija No Send

Make we no lie, Gabon no come to joke. That their old soldier, Pierre-Emerick Aubameyang, still dey do wonder like say e be small boy.

The guy don score seven goals already for the qualifiers — e still dey shine like say age no dey catch am.

Iwobi sef hail am small, talk say, “Auba fit don old for paper, but the guy still dey move like motor wey dem just wash engine.”

But our midfield maestro no even dey shake. E talk say even though the man na threat, Super Eagles don dey cook their own game plan under new coach Eric Chelle — the same coach wey lead them beat Benin last month.

And with Osimhen dey front dey vex for goal, plus Iwobi dey control midfield like DJ for club, Naija boys believe say dem fit knack Gabon well-well reach the playoff final.

Iwobi Send Message Give Naija Fans

Iwobi still reason the fans wey don dey para small because of the earlier yeye performances. E no dodge am — e talk am straight.

“My people gats know say we dey chase the same goal,” e yarn. “I sabi say e dey pain una when we no dey win easily, e dey pain us too. But no be mouth go win match — na pitch we go show say we mean am.”

Na so the matter be. Talk don finish, na action remain. If Super Eagles deliver on Thursday, beer go flow for every street corner from Lagos to Aba. But if dem mess up… chai, even Iwobi go feel the heat.

“We dey feel say any day, if we give 100% and our players dey ready, we fit beat any team. But one thing be say, to talk am easy, we gats show am for field,” na di last thing wey em talk.

Na small thing remain make we know whether na Up Naija or na so so sigh we go dey sigh tomorrow.

You like this gist abi?
Oya, we go like hear from you. Help us drop small comment for the box below!