Ebenezer Akinsanmiro scatter ground on Friday night as the young Super Eagles future baller drop him first assist of the season for Pisa, inside one gbege 2–2 draw with AC Milan for Serie A.

The small but stubborn midfielder dey inside all the hot moments for the match, push the comeback, run 90 minutes full, no remove battery, for inside Stadio Giuseppe Meazza wey full like crusade, na weytin hitvibz dey yan be dat.

Ebenezer Akinsanmiro’s Wicked Assist Cause Last-Minute Wahala

Akinsanmiro, wey Inter Milan loan give Pisa, burst everywhere for the 86th minute.

As he see one coded run from back, the 20-year-old just catapult one long pass from centre circle wey tear Milan defence like old nylon.

The vision, ehn? Na pure hawk-eye. The pass land for M’Bala Nzola chest, baba control like Odogwu, finish am cool, give Pisa 2–1 lead. Na so stadium shock.

This na Akinsanmiro 6th Serie A match this season, and e don clock 568+ minutes for league football.

Even though some Milan men bounce am for midfield, the guy still dey ask for ball like “give me jare, no fear,” and him still dey dictate play.

Milan Spoil Show with Stoppage-Time equaliser

Pisa don almost write history, but Milan spoil the cruise for added time. Zachary Athekame nak one long-range missile for 93rd minute — boom — 2–2. League leaders just steal one point like pickpocket for Oshodi.

Earlier for the match, Rafael Leão don already open scoring for Milan inside 7th minute. Juan Cuadrado later equalise for 60th minute to ginger Pisa comeback.

That late Pisa wahala for end suppose give them win No. 2 of the season, but Milan last-minute gbas-gbos talk say lai-lai, no victory for una today.

The draw still keep di 9ja bobo and em team inside relegation mud — 18th position with only four points from eight matches. Milan remain top with 17 points, but Inter, Napoli or Roma fit collect that number one seat if results shift.

You like this gist abi?
Oya, we go like hear from you. Help us drop small comment for the box below!