The Super Eagles don kiss World Cup goodbye after dem knack 1-1 draw with South Africa for Toyota Stadium inside Bloemfontein.

Even though Naija still dey carry that unbeaten ginger against Bafana Bafana for qualifiers, the draw mean wahala – six points dey clear like NEPA light, and only two games remain. Otilo, na weytin hitvibz yan be dat

Early gbege for Super Eagles: Aina wound, Ekong wahala

Naija night start with bad luck. Just eight minutes wey game never even hot, Ola Aina don limp comot. Fans never even sit well, wahala don land.

Before person fit sip beer finish, another kasala burst – William Troost-Ekong mistakenly jam ball enter him own net. Bafana carry 1-0 lead dey dance shaku-shaku.

To add pepper, that goal mean Naija never sabi keep clean sheet against South Africa for their last eight meetings. Na which kind juju be this?

Bassey show body, rescue one point

But Super Eagles no gree die. Bright Osayi-Samuel wey just enter show him skill, deliver sweet cross like party jollof. Calvin Bassey rise like say dem tie rocket for him head, nod am inside net – 1-1.

The boys push hard, throw body, but that winning goal no gree show face. Na so e end.

Wetin e mean for Naija ball

Yes, we still hold record – six games unbeaten against Bafana (three win, three draw). But make we no deceive ourselves, this 1-1 no save Naija World Cup waka.

Back-to-back we don miss the world biggest football stage. E pain. For country wey get talent scatter for Europe, na shame we dey collect steady.

South Africa dey top group with 17 points, Naija dey second with 11. Six points gap, two games left – my brother, na mathematics wey no get solution.

Next stop: Lesotho on October 6. After that, Benin on October 13. But make we talk true, the World Cup don waka go without us. Na just pride dey remain.

You like this gist abi?
Oya, we go like hear from you. Help us drop small comment for the box below!