Naija Super Falcons no even wait make breeze blow before dem begin knack better ball for Stade de Kégué for Lomé, as dem run Benin Republic street for the first leg of the 2026 WAFCON qualifier on Friday evening.

Omo, the first half na premium cruise as the girls handle business sharp-sharp, clear road and lock 2–0 win just like that, na weytin hitvibz dey yan be dat.

From referee first whistle, Naija just dey control the match like person wey dey remote TV. Possession? Na our own. Pressing? Na we invent am. Benin just dey look like people wey borrow boot.

Benin vs Nigeria: Early Fire, Plenty Pressure, Small Missed Chances

Benin park bus sotey the motor no get fuel again. Dem just fold all their players for back dey wait for counter like say na transport line.

Just seven minutes, wahala wan start. Rasheedat Ajibade nearly tear net but na the woodwork block her shine. Cross-bar just dey do bodyguard — e reject the ball wey suppose be 1–0. The keeper sef thank God for that one.

Ihezuo Open Shop for First Goal — WAFCON Don Hear Am

But you no fit hold Falcons down abeg. 23rd minute, Chiwendu Ihezuo break the table scatter — lob wey sweet like chilled zobo.

She collect one sweet long pass from Deborah Abiodun, control am, see keeper, then just chip am with confidence. 1–0, Benin don smell pepper.

By 35th minute, Benin nearly equalise but Chiamaka “Wall of Lagos” Nnadozie fly like superhero. One wicked save keep score 1–0 and keep Naija momentum dey gallop.

Okoronkwo Add Second Goal — 2–0, Case Close for Super Falcons

Inside first-half injury time, Nigeria strike again. Esther Okoronkwo calm the ball, package am, and just slot second goal like person wey no dey rush life.

Deborah Abiodun again with assist number two — midfielder just dey distribute like MTN data plan.

With Jennifer Echegini injury, Deborah talk say, “una no worry, I dey here.” And she prove am.

First half end — Benin 0, Naija 2. If na boxing, referee for don stop fight.

Second half? No drama, no stress. Falcons just maintain shape, hold the two goals like correct gele, and play am with maturity till final whistle.

Naija don win WAFCON 10 times before and from the look of things, these girls still hungry to guard their crown wey dem reclaim for Morocco 2024.

Next stop — second leg on Tuesday for naija soil. That one fit turn to festival.

5 Things We Sabi From Dis WAFCON Qualifier

1. Deborah Abiodun — Midfield Minister of Enjoyment

No Echegini? No wahala. Deborah carry band for midfield. Two assists, sweet vision, better passing. She dictate the tempo like choir mistress.

2. Ihezuo & Okoronkwo — Two Goals, Job Done

Di two strikers show composure. Ihezuo with the lob, Okoronkwo with the killer finish. That’s how to deliver when e matter pass.

3. Ajibade — Captain with Too Much Wahala

She hit woodwork early, but her pressing and hustle set tone for the whole attack. Proper leader.

4. Nnadozie — Save Wey Keep the Groove

At 1–0, things fit change, but her big save maintain control. That moment na key.

5. Super Falcons — First Half Dem Dominate, Second Half Dem Manage

Sharp 45 minutes to win match, then calm maturity to protect am. No panic. No gbege. Just sense.

You like this gist abi?
Oya, we go like hear from you. Help us drop small comment for the box below!