Naija baller Victor Boniface collect em first start of the season as Werder Bremen squeeze Union Berlin 1-0 for their tight Bundesliga match on Friday night.

The Super Eagles bobo stay for pitch for 85 minutes before dem commot am for Keke Tapp inside Weserstadion, na weytin hitvibz dey yan be dat.

Victor Boniface Still Dey Find Him Goal Mojo

The 24-year-old no hide at all — e touch ball well, e run, e hustle — but that final finishing wey fans dey wait, e no show.

Boniface touch the ball 40 times, fire five shots, complete 14 correct passes and still create one clear chance.

But wahala be say three of him shots jam human wall, Union defenders no allow breeze pass. Dem still dispossess am once, and the goal drought con stretch like chewing gum reach 211 days.

Na 13 straight games now without goal for club and country. The last time this guy score na March 28, when Leverkusen knack Bochum 3-1 for Bundesliga. Since then, na silent mode.

Boniface Para Small After Match

After the match, Baba vex reach Instagram and drop one emotional proverb:

“The past few months, na goat carry me go dragon house.”

Meaning say, e don tire. E pain am.

Remember say Werder Bremen grab am on loan from Bayer Leverkusen on deadline day after that AC Milan move scatter because of failed medical. Bremen loan self no get buy option — na pure borrow and return.

Since e land Bremen, dem mostly dey use am like spare tyre — mainly from bench. Him only contribution na one assist for September 14 when dem flog Borussia Monchengladbach 4-0.

But since that day, na five straight games — zero goal, zero assist. Japa of form dey worry am.

From Bundesliga Champion to Dry Season Striker

Last two seasons, Boniface be terror —
2023/24: 14 goals, 8 assists for league. 21 goals, 9 assists for all competitions.
2024/25: 11 goals, one assist.
Guy been dey hot like fresh suya. But now? The finishing wire don loose.

The dry spell even affect am for national team matter. Coach no call am for recent World Cup qualifiers vs Lesotho and Benin. And as Gabon and Cameroon dey come, bros must find him scoring boots quick, otherwise bench go continue.

Last time e wear Super Eagles jersey na July for 1-1 draw vs Russia. 13 caps, zero goals — e never score for Naija at all.

Now Bundesliga Matchday 9 dey next, away to Mainz for Mewa Arena. Eyes go full ground to see whether Boniface go finally break this 211-day drought or whether the dry season go continue.

You like this gist abi?
Oya, we go like hear from you. Help us drop small comment for the box below!