Baba God abeg, this Esther Okoronkwo no wan slow down at all. Super Falcons striker just dey burst net and dey share assist like gala seller for traffic.
On Saturday, she carry AFC Toronto put for correct cruise as dem knack Calgary Wild 2-0 for York Lions Stadium, na weytin hitvibz yan be dat
Esther Okoronkwo Sparks Toronto’s 2-0 Victory
Na she open the scoring wey scatter Calgary defence like Agege bread. The babe play 86 solid minutes before dem replace am with Jade Kovacevic.
Guy, her numbers dey mad—9 goal contributions for just 14 games. Na 4 goals plus 5 assists. You fit see say na key woman for that Toronto team.
Before halftime, she join body with Zeo Burns wey slot the first goal sharp sharp.
Then as dem still dey find seat after break, Burns double the thing for 47th minute. Just like that, Toronto don bounce back from their 1-1 draw with Ottawa Rapid and the slim 1-0 wey Vancouver Rise nack dem.
Next stop? Halifax Tides on September 6. Dem dey top table and Esther dey carry the torch like say she be Usain Bolt for Olympics relay.
Joy Omewa Shines for Fortuna Hjorring in Champions League
Make we shift small go Denmark. Our Naija pikin Joy Omewa dey turn into real wahala for defenders.
Di babe score the only goal as Fortuna Hjorring knack Young Boys 1-0 for UEFA Women’s Champions League qualification.
Na for 58th minute she show face, bury the ball like undertaker. That goal carry Fortuna waka straight enter next round.
Omewa don dey on fire steady—3 straight games now wey she don carry her name put for scoreboard. First na against Aarthus for league, then back-to-back strikes for Champions League qualifiers.
At just 22, the girl dey form like say she wan collect microphone from Ajibade and say “I don arrive o!” Now Fortuna dey dance enter third round with swagger.
Omo, see as Esther Okoronkwo dey scatter Canada and Joy Omewa dey run things for Europe.
Two Naija babes just dey carry Super Falcons flag like say dem dey audition for Avengers. Abeg, defenders go need Panadol extra for this season.
Be the first to comment on "Esther Okoronkwo dey Hot, Joy Omewa Burst Net as Toronto & Fortuna Grab Better Wins"