Omo, Rivers United no find am easy for Maiduguri as El-Kanemi Warriors hold dem strong like stubborn landlord wey no wan gree.

Pride of Rivers try all the waka, still no fit scatter the Desert Warriors defence. Na so dem manage waka commot with just one point for pocket, na weytin hitvibz yan be dat

Rivers United vs El-Kanemi – Na Dry Draw We See

First half, Rivers boys come with fire. Seyi Oguntayo nearly break net, Emmanuel Nnaji nod ball wey just waka pass bar like drunk man miss road. Fans don dey shout “goal!” but e no enter.

But you see El-Kanemi? Dem no dey hear word. Na real stubborn defenders. Dem just dey block everything like bouncer for club. Pride of Rivers dey vex, but nothing gree enter net.

This draw still get small silver lining sha – Rivers United never lose for their last three waka go Maiduguri.

One win, two draws. But e get as e be because the result carry dem drop for 8th position with five points after three games. Na table wey no too sweet be that.

Finidi George Yan: “We Gats Park Bus Too”

After the game, oga coach Finidi George – yes, our ex-Super Eagles baller – yarn say hin boys no get choice but to defend deep if dem wan commot with point.

Hear am:

“This place no be beans o. To collect one point here na war. My boys defend well, especially for last 25 minutes. We try counter, e almost click, but no way.”

Em add again:

“First half na 50-50. We push, we control small. Second half, na dem carry chair sit down for our half. We no get choice than to park bus and dey look counter. But dem dey too sharp for ball, dem no gree. At the end, we gats thank God say na draw we carry go house.”

Guy talk am like man wey sabi say sometimes na survival football dey save career.

Next Stop for Garden City Boys

Now, Rivers United don get one win, two draws. Next assignment? Na Shooting Stars for Port Harcourt this Sunday. Na Adokiye Amiesimaka Stadium go host the wahala.

Shooting Stars sef dey find win like man dey find network for village. Dem don chop one small loss first game, then two back-to-back 1-1 draws. Both teams dey hungry. Na why this match go hot like suya for grill.

If you no dey Adokiye this weekend, bros, you go miss! Rivers dey find three points, Shooting Stars dey find first win… e fit be 90 minutes of pure gbas-gbos!

You like this gist abi?
Oya, we go like hear from you. Help us drop small comment for the box below!