Real Salt Lake don confirm say dem don sign Victor Olatunji, one 25-year-old Naija striker, wey come from big Czech club wey dem dey call Sparta Prague.
Di MLS club knack di big-money transfer for round $2.5 million, lock am down till June 2028, plus option to extend reach 2029, na weytin hitvibz dey yan be dat.
Victor Olatunji Dey Carry Speed, Power and Champions League Experience
Dis signing enter at di time wey RSL need am well-well, as dem dey sit for 8th position for Western Conference, just manage above di Audi MLS Cup Playoffs line, wit 10 matches remain for regular season.
Dem still add join di deal $125,000 General Allocation Money (GAM) for 2026, give D.C. United so dem fit clear Olatunji Discovery Priority rights.
Di club oga for ball matter, Kurt Schmid, yarn say dem believe well for wetin Olatunji go bring:
“We dey happy say Victor don land for Utah, na move wey we don dey plan since,” na so Schmid take talk. “Victor get speed, muscle and brain for inside box, and we believe say e go blend enter our attack.”
Olatunji CV no be beans, di guy don score 42 goals, plus 11 assists for 192 games across clubs for Austria, Cyprus, Slovakia, and Czech Republic.
For Sparta Prague alone, e net 20 goals plus 7 assists for 93 games, and e sef don show face for Champions League, score two goals inside eight games.
Olatunji Dey Inspired By MLS Move, Link Up With Him Naija Brother Agada
As e talk about di move, Olatunji no hide him joy say e dey enter MLS:
“I happy well to play for Utah and for America,” na so Olatunji yan. “I don hear and see better things about Real Salt Lake and di whole setup, na dat kind inspiration carry me come.”
Now, e go battle for dat No. 9 shirt with another Naija striker Agada, and Brazilian baller Rwan Cruz.
RSL attack line still get USMNT star Diego Luna and one Designated Player wey dem dey call Diogo Gonçalves – na correct combo as dem dey prepare enter playoffs.
As di season dey wind up, RSL go hope say Olatunji go bring goals, ginger, and small Champions League pepper enter di MLS playoff fight.
Be the first to comment on "Victor Olatunji: Naija Baller Wey Dey Ginger Don Land For MLS, Join William Agada For Real Salt Lake"