My people, make una hear tori o! Super Falcons hopeful, Edna Imade, don turn the whole Spanish women’s league upside down.
The babe collect Liga F Player of the Month for October 2025 after she show pure fire wey even Messi go nod head in respect, na weytin hitvibz dey yan be dat.
The Naija striker, wey dey on loan for Real Sociedad from Bayern Munich Feminine, no dey play at all.
She don turn to full-blown menace for defenders, dey score like say dem promise her jollof for every goal. Right now, she be one of the hottest names wey dey shake Europe.
Edna Imade Dey Catch Fire for Real Sociedad
October na the month wey Edna vex for ball. Babe score five goals for just three matches! You hear am? Five! Asin, defenders no see road again.
She kuku start di month with one sweet goal against UD Tenerife, as she come score Sociedad only goal for the 2-1 home loss.
After that, she knack two goals against her former team Granada for their 2-2 draw, before she finish the month with another two goals wey help Sociedad beat Eibar 3-0.
The peak of the show na when she face Barcelona. She carry penality, bury am clean, end Barca 10-match unbeaten run just like that.
You for see as the Catalan babes dey look themselves like “wetin just happen?” Na that goal scatter the whole Liga F title race.
Now, the 25-year-old don get seven goals this season, and e be like she still dey warm up.
Last season she net 16 times, and this year she wan break her own record. No be small thing o — Real Sociedad fans don dey call her “La Naija Queen of Goals.”
If dem dey share form for market, Imade go dey collect wholesale. The girl consistency dey fear person. Now everybody for Europe dey mention her name for same breath with the big guns.
NFF and Super Falcons – Make Una No Sleep on Top This Matter o!
Now, na the wahala part be this. Even with all her hot form, Edna Imade still dey do “I never sure” with Super Falcons. Na why fans don dey para small.
NFF and coach Justine Madugu never tie her down officially, and gist don dey fly say Spain dey eye the babe.
My brother, if Spain snatch this girl, e go pain! This kind player no plenty — she get speed like Bolt, brain like Okocha, and she finish ball like Asisat Wey no dey miss target.
Na the kind striker wey fit ginger Falcons for 2027 Women’s World Cup. But if NFF no move sharp-sharp, we go just dey use am do “remember when she used to be ours.”
Naija don lose talents before, make we no use Edna join the list. The girl dey give free warning with her boots every weekend for Spain — the ball dey talk say, “Naija, make una act fast!”
Because if we slack, e go be another case of “had we known.” And you know Naija fans no dey ever forgive that one.
Abeg, Super Falcons, make una reason am well — this Imade babe na pure gold wey dey shine for Europe. Na time to claim our own before she go change passport!
You like this gist abi?
Oya, we go like hear from you. Help us drop small comment for the box below!
Last Updated on November 4, 2025 11:02 am by Hitvibz Media
Stay connected