My people, wahala dey o! Brentford midfielder Frank Onyeka no hide em mouth oh!—e talk say Super Eagles dey under serious pressure as dem dey prepare for World Cup qualifiers against Rwanda and South Africa.

But calm down. The guy still yarn say the boys dey together, morale dey, and dem no go gree shame catch Naija, na weytin hitvibz yan be dat

Frank Onyeka Sure Say Eagles Fit Still Fly

September go hot! First stop na Uyo on September 6 when we jam Rwanda. After three days, na tough away trip to South Africa, Free State Stadium—no be beans o.

Make we no lie, only four games remain for Group C. If we no collect maximum points, e fit scatter our World Cup dream like akara wey fall for gutter.

Last time around, we knack Rwanda 2-0 for Kigali (big ups to Osimhen wey score brace). But against South Africa, na only Dele-Bashiru save us with equaliser for 1-1 draw inside Uyo.

Onyeka sef admit say the team never deliver well for qualifiers. But the guy no dey fear. E believe say e still possible.

Him talk am straight:

“E no easy with how we don play before. True true, we dey difficult position. But as team, we dey do everything we fit.”

Super Eagles Dey Prepare for Do-or-Die Gbas Gbos

See ehn, na do-or-die levels now. Manager Eric Chelle and him boys dey chase South Africa wey dey top group with six points clear. If we no shine eye, dem go carry the ticket waka comot.

Pressure dey build like NEPA transformer before rain fall. South Africa sef dey come with Hugo Broos and him technical football wey dey always stress us.

But Onyeka dey ginger us:

“We dey confident, training dey go well. Coaches and players believe say we fit carry better results.”

Big Boys Don Land Camp

Since Wednesday, training don hot. Big names don land: Osimhen wey dey always scatter net, Lookman wey dey dribble like say ball get WiFi, Tolu Arokodare, Christantus Uche, and midfield machine Raphael Onyedika.

Na so dem dey drill for camp like say dem wan fight civil war. Sweat dey flow, ginger dey rise.

Naija Destiny Fit Decide This Month

Make we no deceive ourselves—four games remain. If we no package well this September, 2026 World Cup go just waka pass us like danfo wey no stop.

The double-header against Rwanda and South Africa na the koko. If Eagles fail, na beer parlour go full everywhere with “if to say” gist. But if we succeed—omo, Naija go scatter with celebration.

You like this gist abi?
Oya, we go like hear from you. Help us drop small comment for the box below!