My people, na so Gift Monday take show herself again for Yankee ball, as Washington Spirit knack Portland Thorns 2–0 for Audi Field.

The babe no dey do shakara — she just dey deliver steady. Another match, another goal. E be like say na Owambe she dey go, because she dey score like person wey dey dash party souvenirs, na weytin hitvibz dey yan be dat.

Gift Monday shines wella NWSL semifinal ball

This same Monday wey nod Spirit enter semifinal with that correct header against Racing Louisville no even allow breeze blow first. From the 27th minute, she don burst net.

Rosemonde Kouassi carry ball from her own half run like say na thief dey chase am, release one sweet pass, and Monday just package herself, run inside space, push ball enter empty net. Easy like Sunday morning.

The finish dey cool, composed, and sharp — like striker wey don find her scoring boots again. And as usual, her combo with Kouassi still dey hot like suya wey just commot fire.

Their linkup for this semifinal na replay of the same chemistry wey help Spirit survive quarterfinal wahala.

Even though say she touch ball only 31 times — lowest for any player wey play full 90 — she still knack her second back-to-back goal for Spirit.

Remember say this same Monday end small goal drought with that 73rd-minute header against Louisville.

That match almost give person hypertension before Spirit finally drag qualification for penalty shootout. But Monday no send — she dey show for big moments like prime Drogba.

Monday: She be special gift to Spirit for dis their playoff

For this semifinal, Monday carry the same ginger enter the game. Her movement na premium. Her composure na iced. Her finishing? Clinical like doctor with steady hand.

The babe don get 13 goal contributions this season — 10 goals, 2 assists for NWSL, plus one extra goal for CONCACAF Women’s Champions Cup. Spirit fans no fit complain; na full value for money.

Deborah Abiodun sef enter the show for second half, replace Leicy Santos for 72nd minute, put small Naija spice inside the midfield.

Then just seven minutes before game go kpai, Croix Bethune nail the coffin with one late strike. Spirit control the match like say na dem get remote.

Now Washington Spirit don book final ticket straight to PayPal Park for San Jose. No be luck, no be miracle — na pure work rate and ginger.

Gift Monday dey play like person wey wan remind everybody say women’s football get real ballers. Na she be the real Monday motivation.

You like this gist abi?
Oya, we go like hear from you. Help us drop small comment for the box below!