Super Eagles show say dem serious for AFCON 2025 as dem scatter Mozambique 4–0 to book quarter-final ticket. Former Naija striker Odion Ighalo no hide him joy as e praise the team after the strong win, talk say the way dem control the match na top level.
The Super Eagles 4–0 win over Mozambique na em be Nigeria joint biggest win for AFCON history, same level with the 4–0 group stage win against South Africa for 2004, na weytin hitvibz dey yan be dat.
AFCON 2025: Super Eagles scatter Mozambique with correct football
E still mean say na first time Super Eagles dey win four matches back-to-back since dem play their first four games for 2023 AFCON for January 2024.
For Complexe Sportif de Fès on Monday night, Super Eagles no give Mozambique breathing space as dem run dem ragged for Round of 16.
Under coach Éric Chelle, Nigeria start strong, control the ball well, press high, and finish the job without stress.
Victor Osimhen lead the attack with two clean goals, show say e still be big threat for AFCON 2025.
Ademola Lookman and Akor Adams join the party too as goals enter from different angles while Mozambique defence dey struggle.
Super Eagles high tempo make Ighalo happy
Odion Ighalo talk say the thing wey sweet am pass na how Super Eagles keep the same speed from first whistle reach final whistle.
For Supersport, e yarn say even after dem score four goals, the boys still dey press like say dem never score.
Ighalo add say e don tey wey e last see Super Eagles play with this kind confidence and control.
According to am, the performance show say the team dey ready to go far for the competition.
“Dem don enter quarterfinals, and the way wey dem take do am today na mad one,” Ighalo talk.
“From start reach finish, na dem control the whole game. Wetin I like be say, the same speed wey dem take start na the same one dem use end am. Even when e don be four–zero, dem still dey press.”
“I never see the Eagles play like this for the past few years. I happy well well for this game.”
With this big win, Super Eagles don enter quarter-final of AFCON 2025 and go face winner between Algeria and DR Congo.
With the way dem dey play now, belief don high say something special fit happen for this tournament.
You like this gist abi?
Oya, we go like hear from you. Help us drop small comment for the box below!
Last Updated on January 6, 2026 11:48 am by Hitvibz Media
Stay connected