Algerian Ligue 1 club JS Saoura don finally complete the signing of Anas Yusuf, end all the long talk wey don dey fly about the future of the NPFL top sharp-shooter.

Dis move na big upgrade for the 22-year-old striker, especially after the mad form wey he show during him time with Nasarawa United, na weytin hitvibz dey yan be dat.

Anas Yusuf don land JS Saoura after goal pepper for NPFL

Saoura confirm Yusuf signing on Saturday after the Nigerian striker pass him medicals clean.

The Algerian club drop the announcement for their official social media, confirm say the deal don seal and Yusuf don enter North African top-flight football proper.

After the kind season wey Yusuf play for NPFL, plenty clubs for the region dey eye am. Baba finish last season as NPFL highest goal scorer, dey bang goals steady.

Na so him name take blow well-well, come turn one of the hottest strikers outside Nigeria.

Yusuf legacy for Nasarawa United & how e take blow for NPFL

Before the deal clear, gist don dey say Yusuf comot Nasarawa United sharp-sharp, with rumours linking am to Tunisia.

That time, Nasarawa United no talk anything, which make people dey wonder wetin really dey sup.

That silence break Saturday evening when Solid Miners confirm say Yusuf don officially leave the club.

For message wey dem post for their Facebook page, the club hail their all-time top scorer and wish am better things as e dey start fresh life with Saoura for Algerian Ligue Professionnelle 1.

Yusuf leave Nigeria after serious goal run. Last season, e score 18 goals finish as NPFL top scorer, plus 7 goals this current season before e waka commot — just one goal behind the league top scorer Chidozie Iwundu.

Yusuf football journey for Nigeria start with Nasarawa United for 2017/18 season, after e join dem as free agent.

After three seasons, e move go Wikki Tourists for 2021/22 season, before e return Nasarawa, where e turn full-time goal machine.

Now wey e don join Saoura, Yusuf get new challenge for front. The plan na to carry that NPFL goal fire go continental level and make name for Algerian football.

You like this gist abi?
Oya, we go like hear from you. Help us drop small comment for the box below!

Last Updated on January 31, 2026 10:39 pm by Hitvibz Media