Super Eagles boy Gift Orban no dull at all for Sunday afternoon show. The guy dey ginger like say dem put battery for him leg — one sweet assist, nearly score sef, but Verona still manage lose 2-1 for house to Inter Milan. Serie A wahala no dey finish o.
The 23-year-old don play nine league games this season, and this one na another banger performance, na weytin hitvibz dey yan be dat.
Gift Orban Cook the Equaliser, But Village People Still Do Meeting Late
From kickoff, Orban dey everywhere like okada man wey no get brake. Every Verona attack get him name inside.
Baba Orban hustle pay just before halftime — he serve Giovane correct pass wey the guy hammer inside net. Na him first assist this season, and the crowd burst like say dem just win league.
No even two minutes later, Orban nearly turn goal machine. He fire one missile wey shake post, Sommer for Inter just dey watch like Netflix. If that ball enter, na highlight reel goal be that.
The boy play 73 minutes before coach comot am for Cheikh Niasse, but everybody know say the Naija boy show face well. Now he don get two goals plus one assist for Serie A — small small, the former “next big thing” vibe dey come back.
Inter Milan Use Last-Last Juju Steal the 3 Points
Orban and Verona try, but Inter na big boys wey sabi the street. Çalhanoğlu open scoring early with one fine volley — that kind shot wey make defenders begin do prayer.
Then when everybody don dey expect draw, Barella cross one ball for extra time, e jam Martin Frese and enter net like joke. Imagine the heartbreak.
Verona fans just quiet — na so winless run don reach ten games now. Relegation zone still dey look them eye to eye.
Inter meanwhile don waka close to Napoli for top of table. Dem no dey play.
But for Orban? Baba fit raise head. E show hunger, show skills, and show say even if Verona dey sleep, Naija no dey dull. The boy dey ball — e just need better support.
You like this gist abi?
Oya, we go like hear from you. Help us drop small comment for the box below!
Last Updated on November 2, 2025 10:13 pm by Hitvibz Media
Stay connected