As the 2025/26 NWFL Premiership season go launch on November 26, na serious battle field we dey enter like this oh!

Rivalry go choke, young ballers go dey scatter talent anyhow, old clubs go dey drag bragging rights, and na there champions dey born like fresh suya wey dey hot for charcoal, na weytin hitvibz dey yan be dat.

From old-school legends wey don retire to the new shakara stars wey dey rise, this season no be small. Abeg hold your seatbelt.

NWFL Premiership: Where Naija Football Queens Dey Graduate From

This Nigeria Women Football League no be today dem start am. E be like grandfather for women football.

Na from here plenty of our Super Falcons don pass through, chop experience, scatter defence, and waka go national team like say dem get visa wey no dey expire.

Na NWFL Premiership dey Produce Super Falcons Stars

Over 70% of our current Super Falcons na product of this same NWFL. Meaning say anytime person dey watch match, e fit be witness to another future superstar wey go soon dey collect endorsement like Indomie. Every match na potential “God when?” moment.

Margins Matter

Last season? E resemble those tight Premier League title race wey person go dey calculate goal difference like bank transfer.

Confluence Queens and Benue Queens collect L tire — 11 losses each! But na the same 11 wins help Edo Queens carry their group like beverage seller wey win promo.

For this league, small mistake fit turn person to “we go bounce back” motivational speaker.

Bayelsa Queens’ Legacy

Bayelsa Queens na real madam for area. Dem no just win Super Six last season, dem use am do ritual for sixth title. Powerhouse no be gra-gra, na consistency. Dem dey collect trophy as if na monthly salary.

Super Six Contenders

Remo Stars Ladies and Nasarawa Amazons? Dem dey drag body too last season with 9 wins each. Dem just dey eye Edo Queens’ 11 wins like thief dey observe supermarket CCTV. Super Six slot no dey for people wey dey do “after you”.

South West Giants

South West don pack 8 teams this season. Na dem get crowd pass! FC Robo Queens, Pacesetter Queens, Sunshine Queens — everywhere Queens.

If dem call Southwest “Women’s Football Lagos Traffic,” e go make sense: congested, noisy, and full of wahala talent.

Fine Margins of Motivation

FC Robo Queens and Abia Angels last season nearly jam Super Six, but small miscalculation push dem comot. Na those type heartbreak wey fit turn person to beast next season. Expect vibe like wounded lion wey no gree drink water.

The Super Six Dey Wait

Only 6 teams go chop Super Six. Last time na Edo Queens, Remo Stars Ladies, Nasarawa Amazons, Bayelsa Queens, Rivers Angels, and Naija Ratels FC chop the slot. This season? Na who get mind go collect. No space for “we try.”

Na Fresh Start for Benue Queens

Benue Queens last season finish with 5 points. Yes, 5, no typo. But na new season wey dey come. If dem clean eyes and reset like phone wey hang, story fit change.

Titans Wey Everybody Don Forgot

Ufuoma Babes be like old Skool Wizkid mixtape — legendary but no dey again. Between 1992–1996, dem win four titles, dominate anyhow, and produce Falcons icons like Uche Eucharia, Mavis Ogun, Love Branch. Dem be pioneers when football no get hype like today.

When Rivers Angels Rule Everybody

Rivers Angels no be tag team. Dem win three straight titles from 2014–2016 before Nasarawa Amazons use 2017 spoil the monopoly. Rivalry wey sweet like derby with small pepper.

The Last Back-to-Back Champions

Dem still be last team wey win back-to-back league titles in 2019 and 2021 (COVID pause no stop dem shine). Dem no dey do season by season—na brand. Consistency na their middle name.

Season Wey Only 19 Teams Go Play

This 2025/26 season? 19 teams dey hustle like fuel queue. Everybody dey chase trophy like posh babes dey chase giveaway. Castmog Ladies don go relegation, Rivers Angels go chop bye for Matchday One. Survival na hunger games.

NWFL Premiership Relegation Wahala:

• 2 teams go drop from Group A.
• 3 teams go drop from Group B.

Meaning say, if you slack, na “we move” go shift to “we drop.”

As na only 19 teams go enter battlefield for November 26, Naija women football go burst everywhere like December concert. No dulling. No apologies. This season go hot!

You like this gist abi?
Oya, we go like hear from you. Help us drop small comment for the box below!

Last Updated on November 25, 2025 8:18 am by Hitvibz Media