Remo Stars don turn from defending champion to relegation candidate just like that! The Ikenne boys waka go Lafia on Thursday, collect 2–1 beating from Nasarawa United.

Bros, na their sixth loss in nine games for all competition o — five straight L back-to-back! E be like say Daniel Ogunmodede boys don forget how dem take win league last season, na weytin hitvibz dey yan be dat.

Michael Ibrahim first open the scoring for Remo, everybody think say e go sweet dem. But Nasarawa vex! John Joshua equalise, Jofrank Istifanus finish work. Lafia fans use pure joy scatter ground.

Now Remo Stars dey sit for 17th position with only 10 points. Meanwhile Nasarawa don waka go top of the table.

As e be so, Sky Blue Stars fans dey reason say “wetin really dey happen?”

1. Five Losses in Just Six Matches — Na Wetin Be This?

Last season, after 23 matches dem lose only five. Now dem don reach that same number after just six! Na who jazz these boys? The kind control wey dem get before don vanish like network for village. Title defence don turn title dey fence.

2. Only One Win in Six NPFL Games — Na Dey Play Abi Na Joke?

Their last win come against Wikki Tourist wey no even strong like that. Since then, na one gbege after another. Dem no dey score, dem no dey defend. Imagine, only three points out of possible fifteen. Even relegation teams dey do pass like this.

3. Five Straight Losses — From CAF to NPFL, Na Tears Full Everywhere

After dem chop wotowoto from Katsina United, Mamelodi Sundowns come add salt. Since then, dem never breathe again. Kwara United beat dem, another home loss follow, now Nasarawa join the beating committee. Bros, dem need prayer and formation deliverance.

4. 15 Goals Conceded, Only 4 Scored — Defence Don Retire?

The same team wey no dey allow mosquito pass last season don turn to team wey dey share goals like palliative. In just five games, dem don collect 15 and score only 4. Abeg who unplug their defence line?

5. Flashback to 2022 — But Fit Dem Come Back Again?

We remember February 2022 when dem lose three straight games, dem still bounce back finish third and qualify for continental ball. So maybe hope still dey small. But this one different.

The way dem dey play ehn, e be like say the spirit don comot body. The next few games go show whether dem still get champion DNA or na just last season luck carry dem go far.

Coach Ogunmodede and the Palava for Bench

As result dey bad, tori begin fly say Coach Daniel Ogunmodede don resign. E no take time before Remo Stars drop statement: “Lie! Our coach never go anywhere.” Dem talk say he still dey ground and still dey do assistant work for Super Eagles.

But true talk, the guy never show face since that 5–1 humiliation from Sundowns.

He miss the second leg for South Africa, miss the 3–1 loss to Kwara too. Later gist come out say baba dey Abuja for CAF B coaching course — e explain why we no see am.

E don do this kind before sha. Last season e miss plenty matches because of national duty and CHAN runs, but dem still win league.

Now, club don say make e continue to combine both jobs again. But bros, results dey show say this multitasking no dey sweet again.

From Champions to Wahala Boys — Wetin Remo Stars Go Do Now?

See as life be — from lifting trophy to counting losses like say dem dey do end-of-year audit. The Ikenne boys don turn lesson for NPFL: if you blink small, the league go humble you sharp-sharp.

Whether na small slump or full crisis, na only Remo Stars go answer that one. But make dem no lie — if dem no find back their groove fast, this their title defence go end like party wey rain scatter.

You like this gist abi?
Oya, we go like hear from you. Help us drop small comment for the box below!