Super Eagles star Taiwo Awoniyi don open mind give fans on top the real reason make him leave Nottingham Forest go Coventry City, as him clear the air on wetin carry am go there.
The Nigerian striker don finalize permanent move to the Sky Blues after four seasons for Premier League with Forest, where him knack 21 league goals inside 90 appearances, na weytin Hitvibz dey yan be dat.
Taiwo Awoniyi reveal why him pick Coventry City
Awoniyi no hide him joy at all as the deal scale through, and him talk say him body dey pepper am to kickstart this new level with Coventry City.
“I dey very happy say I complete my move to Coventry City. My body dey shake with excitement for this new season, and I no fit wait to start ball,” the Super Eagles striker talk.
But for Awoniyi side, the matter pass just to join new team.
The 29-year-old Nigerian striker talk say Coventry heavy run and performance last season na him make him mind jump go their side.
“I see how they take scatter ground last season as they jump enter Premier League from Championship, the performance make brain die. Right now, I just dey excited to join them make we kickstart the new season,” him add join am.
That yarn show clear say wetin catch the striker eye na the team progress. The Sky Blues ambition and sharp movement make am know say Coventry na the right place for him next level.
Super Eagles baller dey carry Premier League experience join body
Awoniyi dey step enter Coventry Building Society Arena with proper top-level experience for bag.
The forward sharp for Nottingham Forest for four seasons, where him score 21 Premier League goals inside 90 games, and 23 goals inside 103 matches for all competitions.
Him journey to Premier League no be today.
After him start him professional career for Liverpool, Awoniyi gather better experience for loan waka with FSV Frankfurt, NEC Nijmegen, Mouscron, and KAA Gent.
Him later land Bundesliga, where loan spells with Mainz 05 and Union Berlin shape him career proper.
Him performance for Union Berlin make the team sign am fully for 2021.
Na that time everything set for am.
Awoniyi flex him best goal-scoring season with Die Eisernen, as him score 20 goals, including four goals inside UEFA Conference League.
Na so Nottingham Forest break their transfer record carry the Nigerian striker go City Ground for 2022.
Him show him worth sharp-sharp, as him score 11 goals for him first season and tap Forest commot for relegation when they just return to Premier League.
The Nigerian ball striker join body with the Forest team when chop seventh position for 2024/25 season and secure ticket to play Europe ball.
Now, the Super Eagles forward dey face another fresh challenge with Coventry City.
With 10 Nigeria caps and two international goals already for him pocket, Awoniyi go pray make him experience lift the Sky Blues go higher level.
For Coventry side, to get striker like this with Premier League and Europe experience go boost their engine well-well this season.
You like this gist abi?
Oya, we go like hear from you. Help us drop small comment for the box below!
Last Updated on August 18, 2026 7:58 am by Hitvibz Media
Stay connected