Prosper Obah show heavy standard on Sunday as he wire two correct goals take help the new Ukrainian Premier League champions, Shakhtar Donetsk, wobbled Kryvbas.
The Nigerian striker enter from bench come score for both first and second half as Shakhtar drag the 3-2 away win commot for Hirnyk Stadium, na weytin hitvibz dey yan be dat.
Prosper Obah Score Two Goals As Shakhtar Pass Kryvbas Small
The 22-year-old boy match ground instantly after he replace Eguinaldo for the 22nd minute. It just take Obah 23 minutes for pitch to show himself, as he clinical well-well for front of goal.
The two goals make am three league goals for Shakhtar, and e carry his total layout for this season go 14 goal involvements—11 goals and three assists for all competitions.
Last Wednesday, Obah level up big time after he help Shakhtar Donetsk carry the Ukrainian Premier League title after dem beat Obolon Kyiv 3-1 for home.
The Nigerian striker join the club from LNZ Cherkasy during the winter transfer window after he don score seven league goals and three assists, plus one extra goal for Ukrainian Cup.
Even though play-time never really balance for am since he reach Shakhtar, Obah dey always show workings anytime dem call am.
Obah Dey Form as Em Hit Double-Digit Goal Contribution
The young striker don play 10 matches now for the club, wey be just like 468 minutes, but he don already hit double figures for goals this season.
As we speak, Obah dey fifth position for the Ukrainian Premier League highest goal scorer chart with just one match left, as he dey push to blow properly for Europe.
For that Round 29 match, Shakhtar open floor three minutes before half-time through Lassina Traoré, wey hold correct pass with Irakli Azarovi before he wire the ball enter net.
Just before referee blow for break, Obah double the lead to give Shakhtar full control as dem dey go dressing room.
Kryvbas try reply for second half as Gleiker Mendoza score one back for the 58th minute. But Obah show dem pepper again 10 minutes later to return Shakhtar two-goal gap.
Yaroslav Shevchenko score late one for the home team when three minutes remain, but that one no reach to stop Shakhtar from locking the heavy 3-2 win.
As body dey sweet dem now, Prosper Obah, wey win the man-of-the-match award and em guys don turn eye to their last game of the season against FC Kolos Kovalivka, as dem wan finish the league with vawulence.
You like this gist abi?
Oya, we go like hear from you. Help us drop small comment for the box below!
Last Updated on May 18, 2026 9:30 am by Hitvibz Media
Stay connected