Super Eagles star Ademola Lookman don finally find him scoring boots again as him goal ginger Atlético Madrid to collect three points for Osasuna house on Tuesday evening.
Lookman na him open floor for Atletico as the 10-man team struggle win 2-1 for Estadio El Sadar, na weytin hitvibz dey yan be dat.
Ademola Lookman End Em Small Goal Dry Season for Atletico with Correct Style
Before this match, the Naija forward never see goal or assist for four straight games since him score against Real Sociedad back in April.
For this Matchday 36 waka, the 28-year-old winger don get him third La Liga goal this season, and that one mean say him don get eight goals and three assists for all competitions since this year start.
Lookman play for 82 minutes before coach change am for Clément Lenglet.
Atletico still dey show pepper as the season dey end, and this win na their third victory for their last four league matches. This result don make Diego Simeone boys balance well for fourth position for the table.
The away team start the match with fire for body and dem deserve the lead wey dem get after 15 minutes.
After VAR check the matter well, dem give Atletico penalty because of handball, and our own Ademola Lookman no mistake as him coolly wire the ball enter net.
Since him join from Atalanta for January, na him eighth goal for the club be that.
Simeone Boys Stand Gidigba Despite Osasuna Wahala for Final Minutes
Osasuna try find way come back before halftime, but Ante Budimir fall hand as him miss one clean chance after Koke make mistake for defense.
VAR still show Osasuna shege as the referee cancel one penalty wey him bin give dem before.
After break, Atletico still dey find more goals, but Alexander Sørloth miss two early chances.
Osasuna try well-well to level the score, but goalkeeper Juan Musso stand gidigba and make correct saves to keep Atletico for front.
By and by, Atletico double their lead when Sørloth finish Marcos Llorente cross for back post.
Drama later sup as the ref pursue Llorente comot for pitch with red card. Kike Barja score one late goal for Osasuna but e no reach to stop Atletico as dem carry all three points go house.
You like this gist abi?
Oya, we go like hear from you. Help us drop small comment for the box below!
Last Updated on May 12, 2026 11:31 pm by Hitvibz Media
Ademola Lookman Don Wake! Super Eagles Star Wire Goal Wey Help 10-Man Atletico Chop Points
Stay connected