Super Eagles baller Gift Orban ball well for Hellas Verona, but even him correct second-half boomer no fit deliver their first Serie A win of the season, as Cagliari pull last-minute wahala to force 2-2 for Stadio Marcantonio Bentegodi. Na so heartbreak take enter like NEPA switch.
Verona shak small for opening minutes, but once Orban enter gear, everywhere change, na weytin hitvibz dey yan be dat.
The guy dey run their defence ragged — pace, movement, positioning — e be like say dem no get manual for am.
Gift Orban dey torment Cagliari backline
Verona first draw blood through Roberto Gagliardini, and before you fit shout “Another one!”, Orban almost make am 2-0, but Cagliari keeper, Elia Caprile, vex turn octopus.
First e push Suat Serdar shot go bar, then e still deny Orban rebound header sharp sharp.
Guy just dey catch everything like say na him buy the ball.
Gift Orban no gree tire. Sixth Serie A game or not, e still dey find space for that 3-5-2 setup.
Second half, Verona burst out with one sweet counter.
Na so the Nigerian hitman arrive with perfect timing — one-time finish, bottom corner, keeper confuse. Second goal of the season. Pure striker vibes.
Verona commot hand from steering, Cagliari punish dem
At 2-0, Verona dey control things like title sponsor. Orban don already package headline. But as ball be, na who no sleep till 90+ dey laugh last.
Riyad Idrissi first reduce the matter with 13 minutes to go. Verona con dey shake.
Den the real breakfast land for stoppage time, as Mattia Felici fire equaliser wey spoil everybody mood and stretch Verona winless run reach eight league games. Pain no be here.
Gift Orban commot for 78th minute after serious hustle, but the team still fall hand las-las.
Silver lining for the Verona boys
Even though the result bitter like bitters, Orban still show sharpness, movement and finishing. If the rest of the squad fit wake up, momentum still fit enter this season.
You like this gist abi?
Oya, we go like hear from you. Help us drop small comment for the box below!
Last Updated on October 26, 2025 6:48 pm by Hitvibz Media
Stay connected