Bendel Insurance don set eye for NPFL trophy, and dia chairman no dey play—he wan back dem with action.
Oga Emperor Jarret Tenebe waka enter team camp kpata-kpata after dem wallop FC Rolly 5-0 for preseason match, na weytin hitvibz dey yan be dat.
As he land, he tell the players say better welfare and ogbonge incentives dey wait dem for 2025/26 NPFL season.
“Football na Serious Business”—Oga Tenebe Dey Para for Better Performance
No be just sweet mouth the chairman give—he make am clear say if dem deliver, dem go enjoy correct lodge, beta cars, and other jara.
“Una deserve beta place to sleep, brand new cars, and other better motivation. Once morale high, performance go follow. We dey here to boost una spirit make una deliver wella,” he yan.
He no forget the wahala wey dem face last season, but he hail the boys say dem still stand gidigba.
He tell the players make dem no dull at all. He say the target no be just to win for Naija, but make Bendel Insurance show face steady for Africa level football.
He still hail Edo State govment efforts join:
“Our Governor Senator Monday Okpebholo don ginger Edo Transport Line back to life. As we dey for sports sector, we go make sure say govment no stop to support us, make Bendel Insurance fly reach top-top.”
Oga Tenebe no waka alone—Hon. Amadin Desmond Enabulele from Edo Sports Commission join body. Dem both clear say the mission na one: win NPFL, carry Bendel Insurance go continental.
He come still add:
“We fit win this league. Make we hustle for am well. If una deliver, una go chop beta reward—no be joke.”
Coach Ikhenoba Key Into Chairman Talk
Coach Greg Ikhenoba—Benin Gunners main man—praise the chairman say he dey always support, even when breeze blow anyhow.
He remember how Oga Tenebe give players $3,000 bonus, even for match wey dem no win, just to ginger their morale.
“We really appreciate the surprise visit from chairman. The love and support wey he dey show steady, e no get part two. Even follow us travel for away matches!” na so Coach yan.
As dem enter closed camp, coach talk say the team dey focus gidi-gba. Grade A friendlies and Bayelsa preseason tourney dey front.
“We no go disappoint management,” he promise.
You like this gist abi?
Oya, we go like hear from you. Help us drop small comment for the box below!
Last Updated on July 26, 2025 2:33 pm by Hitvibz Media
Stay connected