Chelsea show say dem get liver for dia match wey dem play against Palmeiras for FIFA Club World Cup quarter-final — and di manager Enzo Maresca yarn say di win na clean win wey dem deserve.

Now, di Blues don turn dia eye to Fluminense for di semi-final, and Maresca don dey reason how dem go take handle another Brazilian wahala, na so Hitvibz report am.

Chelsea prove point for Palmeiras match

As e dey reason di match with di Brazilian team, Maresca talk say di Blues hold ground when e matter pass.

“Me I believe say for first half we control di game well. Dem no fit do us anything. We score di goal, we even fit score more goals. For second half, dem come start pass us; dem come score. Di game come change small; e come turn. But I believe say for di last 20-25 minutes we control di game again. We deserve di win, no be luck.”

Di Premier League side first score before Palmeiras come equalise. But when final whistle blow, di Blues carry di win 2-1, na one late own goal from di Brazilian side help dem.

Fluminense next as Chelsea plan another Brazilian gbege

Now wey Palmeiras don comot for road, Maresca don face Fluminense. Di Brazilian side knack Al Hilal 2-1 to reach semi-final.

For Maresca, Fluminense wahala no be new thing.

“Up till today, na Palmeiras dey my head. But as I talk yesterday, e still show how Brazilian football dey strong. From tomorrow, I go focus on Fluminense.”

E still talk:

“I watch di game this afternoon. I don watch some other matches wey dem play. You go see say dem dey organised well well. Dem get better players. Di coach dey do better job.”

Maresca know say em team go need handle di high ginger wey di Brazilian team dey bring.

“And again, e go still be di same wahala. Di energy wey Brazilian team dey bring for dis competition na better energy. Maybe na because dem dey start dia season now, while we dey end our own. So di energy different. We go try handle am in our own way.”

I sure say fans go dey wait to see if di Blues fit keep di ginger, knack di Brazil team and enter final.

Di EPL side go still meet dia old defender Thiago Silva and him Fluminense people for MetLife Stadium on Tuesday.

You Like this post abi?
Oya, we go like hear from you abeg. Help us drop small comment for the box below!

Last Updated on July 5, 2025 12:08 pm by Hitvibz Media