E-World FC don run am! Di Calabar boys don finally promote enter di NNL afta dem come back beat Ahudiyannem FC for di last NLO playoff match.
Fans wey gather for Sharks Stadium on Tuesday afternoon see how E-World turn di game upside down take secure dia slot for Nigeria National League, na weytin hitvibz dey yan be dat.
E-World Turn Di Game For NNL Ticket
Di team wey dey top table enter di match with plenty ginger.
Dem don already show say dem no dey here play when dem knack Campos FC 3-1 for dia first match and still run FC One Rocket 3-1 for di second one.
Di Cross River boys be real ogbonge favourites for di promotion, and dem show di reason.
Ahudiyannem FC wey come from Abia State enter di game sef with small hope and pride. Dem never win any match, dem draw 1-1 with FC One Rocket and chop 2-0 for Campos FC hand.
Di NLO Promotion Playoff — Southern Zone start as both teams dey hungry to score.
Na Ahudiyannem FC first tear net as Ezeibekwe Kingsley score for 29th minute.
But E-World no gree at all say dem go miss di NNL promotion.
Late Goal Na Im Seal E-World FC Big Comeback
Just six minutes afta, luck waka come E-World side as Kingsley wey first score kon turn to di bad guy — e con mistakenly score own goal give Calabar boys level, 1-1 for first half.
Second half na serious wahala and gbas gbos.
Na for 78th minute Okon Etim fire di winning goal wey seal di 2-1 win and clear road for E-World to enter Nigeria National League gidigba.
Out of happiness, di club owner and CEO of E-World Group Limited, Engr. Etim Okon, dash di boys one million naira for dia correct performance.
For di other Southern Zone match, FC One Rocket chop 4-2 for Campos FC hand for Yakubu Gawon Stadium Elekahia.
Other Teams Wey Promote Enter NNL
E-World FC go join seven other teams wey don promote this season:
Northern Teams:
Kano Ambassadors – Kano State
Warinje FC – Bauchi State
City FC – Abuja (FCT)
Mai Kunkele – Niger State
Southern Teams:
E-World United FC – Calabar
Stormers SC – Ogun State
Hammola FC – Osun State
Ikorodu City FA – Lagos State
You like this gist abi?
Oya, we go like hear from you. Help us drop small comment for the box below!
Last Updated on July 15, 2025 4:10 pm by Hitvibz Media
Stay connected