Super Eagles midfield engine, Frank Onyeka, dey hot like fresh suya right now. Baba don drop another assist for Brentford, show say him dey settle well for Premier League this season.
But omo, even with all him ginger, Brentford still collect breakfast as Sunderland knack dem 2-1 for Stadium of Light. Na last-gasp drama scatter everything, na weytin hitvibz dey yan be dat.
Frank Onyeka Shine, But Em Team Miss Dia Moment
This Onyeka no dey dull at all. Back-to-back goal involvement! Last week, e help dem flog Bournemouth 2-0. This week, e set up Igor Thiago for 77th-minute header wey burst di Black Cats net.
But before that, wahala don start. Kevin Schade waka go penalty spot, everybody don dey shout “goal loading.”
Na lie! Di Black Cats keeper Robin Roefs catch am like gala seller dey catch change. Big chance waste just like that.
Di Black Cats no come dull. Dem don vex after dem waka commot from EFL Cup. Pressure everywhere.
Na so Enzo Le Fée equalise with penalty for 81st minute. Di Bees fans just dey look like person wey miss jackpot.
Sunderland Late Drama Shock Onyeka and Em Team
Game don nearly finish, 1-1 dey balance. Onyeka and him boys don dey happy say dem go carry one point waka. But football no dey hear story.
For 96th minute—yes, injury time wey sweet pass sugar—Wilson Isidor climb higher than NEPA pole, nod Granit Xhaka cross inside net. Stadium of Light scatter like owambe when DJ drop Portable track.
Na so di Black Cats knack dem second straight home win. Newly promoted side dey shine like fresh motor wey just comot from Cotonou.
Di Bees own pain pass, because na dem first loss to promoted team after eight straight wins. Di Black Cats fans dey dance, Brentford dey vex. Football na cruise!
You like this gist abi?
Oya, we go like hear from you. Help us drop small comment for the box below!
Last Updated on August 30, 2025 6:56 pm by Hitvibz Media
Stay connected