Some Naija teams dey still shine gidigba for the knockout stages of the Gothia Cup 2025 wey dey go on for Sweden while some don fall inside gutter as we dey talk like dis.
Teams like Beyond Limits, Mailantarki Care Sport FC, Nigerian Eagles, and Sporting Supreme still dey go strong, na weytin hitvibz dey yan be dat.
But e don red for Sporting Lagos and Derby Football Club as dem don comot for di competition.
Beyond Limits Show Dia Class, Win Nagasaki for Gothia Cup 2025
Beyond Limits no slow down at all as dem wipe Japan team, V-Varen Nagasaki, 3-0 for SKF Arena.
Agbenla Oreoluwa Olawale, Adeboyejo Emmanuel Ayowonuola and Olarinsoye Taiwo Bidemi na dem tear net for the match.
Dem go face Right to Dream next for semi-final, as dem dey eye final.
Derby FC Don Pack Dia Load, One Early Goal Na Em End Dem
Derby Football Club waka comot after Zion Kennedy tear net just one minute into the match for Heden 4 – Puma. Na 1-0 e end.
Mailantarki Care Sport FC Comeback Sweet Like Sugar Against Chivas Satelite
Mailantarki boys no gree fall hand even after dem chop early goal.
For Slättadamm 1, dem turn the game around with goals from Sadiq Ashiru, Chukwusa Godstime Matthew and Abdullahi Abdullahi.
Dem go jam another Naija side – Sporting Supreme – for Playoff A Round of 16. E go hot!
Nigerian Eagles Fly High, Dem Handle NorCal PDP With Ease
Nigerian Eagles waka pass NorCal Premier PDP with a correct 2-0 win for Vallhamra IP.
Fawaz Salami na him open scoring for 38th minute, then Shamsu Mustapha seal am for 59th minute.
Dem dey prepare now to face Nacka FC for next round.
Right to Dream Burst Sporting Lagos Bubble
Sporting Lagos no fit repeat the magic wey dem do last year. Right to Dream’s Bi Voli Bryan Christian Zamble na him burst their net twice for SKF Arena.
Na so Sporting Lagos take waka comot, even though last year dem knack FC Tokyo 4-0 for final to carry B17 trophy.
Sporting Supreme Scatter Åtvidabergs FF Like Party Rice
Sporting Supreme no get chill at all. Dem finish Åtvidabergs FF 8-0 for Klarebergsvallen 2.
Ahmed Njundu Kanyi and Dolo Issa each chop one goal, while Ebrima Manneh and Stephen Ejeh Emmanuel tear net two-two. Yusupha Sohna and Kenneth Anthony join the goal party.
Next stop na clash of titans – dem go face Mailantarki Care Sport FC for all-Naija showdown inside Playoff A Round of 16.
You like this gist abi?
Oya, we go like hear from you. Help us drop small comment for the box below!
Last Updated on July 18, 2025 8:53 am by Hitvibz Media
Stay connected