Na serious ball Nigerian duo Chibuike Nwaiwu and Paul Onuachu play on Saturday night, as both of dem record goal and assist when Trabzonspor face Fenerbahçe for Turkish Super Lig.
But even with all their effort for Round 22 match for Papara Park, Trabzonspor still fall hand for their home fans as dem lose 3–2.
Paul Onuachu don score 16th league goal for hot Super Lig battle
Nwaiwu na him set up the first goal for the home side, while Onuachu later score to make am 2–2 and drag Trabzonspor back inside the game.
But all the hard work no fit save dem, as Trabzonspor chop early second-half goal wey scatter their plan.
The former Enyimba defender finally get him first goal contribution after seven matches for all competitions.
Meanwhile, Super Eagles striker Onuachu don reach 16 league goals this season, making am 18 goal contributions overall.
Just six minutes after kickoff, Ernest Muçi collect correct pass from Nwaiwu and gently lift the ball over Ederson wey come out small — na so Trabzonspor take open scoring.
But their happiness no last reach ten minutes. Talisca collect clean through pass inside the box and calmly slot am for bottom right corner to make am 1–1.
Fenerbahçe punish Trabzonspor
Four minutes after half-hour mark, Fenerbahçe take the lead. Kerem Aktürkoğlu collect pass and fire wicked shot enter bottom right corner — no chance for keeper. 2–1.
Trabzonspor no gree enter halftime quietly. Two minutes before break, Mathias Løvik send sweet cross enter box.
Onuachu jump high and head the ball strong enter bottom left corner. Ederson just watch am. 2–2 before halftime.
But as second half start, Fenerbahçe no waste time. Just two minutes in, Marco Asensio find space inside the box, collect pass from Aktürkoğlu and guide the ball enter net to seal the win.
You like this gist abi?
Oya, we go like hear from you. Help us drop small comment for the box below!
Last Updated on February 14, 2026 10:38 pm by Hitvibz Media
Stay connected