Wen Shedrack Asiegbu waka enter Sharks Stadium field to play for Aba Professionals for one friendly game wey dem play against Port Harcourt Professionals last Saturday, e remind Naija fans why e still be one of di best wey NPFL don produce.
Di 26-year-old midfielder dey play ball for Tanzania now, but e don yan say Naija league still dey ginger e body.
For one exclusive gist with hitvibz, di former NPFL star talk how life don be since e waka go Tabora United — and why, even though e say na upgrade, e still dey miss NPFL well well.
Shedrack Asiegbu waka start from Abia Warriors to Tanzania Football
Asiegbu start e NPFL waka waka with Abia Warriors for 2015/16 season. After four better years, e waka go Enugu Rangers as free agent before 2020/21 season.
Em time with Flying Antelopes mould am well, wey make am turn important player, and na so e get chance go Rivers United.
For Rivers United, e play just one season before e grab di chance go Tanzania go join Tabora United.
Before e waka comot NPFL, Asiegbu don play 174 matches, score 16 goals plus 4 assists — clear evidence say e try for Naija top league.
“No Easy to Dey Play Far from House” — Asiegbu Yarn on Life Abroad
After Aba Professionals manage hold Port Harcourt Professionals 2-2 draw — even though dem dey lose 2-0 wen Asiegbu comot for pitch — di midfielder yan how e life dey be far from Naija.
For am, to dey play abroad no be beans.
“E no ever easy to play ball for another man country, with di language and all di wahala. But I believe say na upgrade for my career.”
Asiegbu talk wetin many players wey dey hustle abroad dey face. But e heart still dey Naija league side.
Wen dem ask am if e still dey miss NPFL, Asiegbu no waste time yan say, “Yes na! I dey miss am, na my league, na where I start my career. So, I dey miss di league scatter.”
Even though e dey play better ball abroad, e still talk say, “Yes! I miss better football, dem dey play better ball dia too, but I still miss better ball for Naija league.”
When dem ask am if e go come back NPFL soon, di midfielder leave am for Baba God.
“Ah! Na God hand e dey; I no fit talk.”
For di recent off-season friendly, Asiegbu run show for Aba Professionals against Port Harcourt Pros for Sharks Stadium.
Even though di Port Harcourt boys lead 2-0 for early second half, Aba Pros no gree as dem fight back to make am 2-2. Asiegbu start di match but dem sub am second half wen dem still dey lose.
You like this gist abi?
Oya, we go like hear from you. Help us drop small comment for the box below!
Last Updated on July 8, 2025 7:21 pm by Hitvibz Media
Stay connected