Super Falcons midfield engine, Toni Payne, show Chelsea pepper on Sunday as she drop one early hot assist wey help Everton shock dem 1-0 for Women’s Super League.

Babe no even waste time — just 12 minutes in, she tear down the right flank like say na her street, whip one low cross enter the box, na weytin hitvibz dey yan be dat.

How Toni Payne Take Arrange Everton Early Wahala

The ball waka reach Honoka Hayashi for back post, and madam no do shakara — she just bend body small, slot am inside net.

Na Payne second assist for the WSL this season, and her fourth goal contribution for 14 matches across all competitions.

The first one self na against Man City when Everton lose 2–1, but as she start her fifth game of the season, she still dey deliver like delivery rider wey sabi road.

How Chelsea Unbeaten Run Take Scatter

Chelsea try settle but Everton no gree at all. Their shape tight like new wrapper.

Courtney Brosnan dey catch ball like magnet, and Ruby Mace dey hold defence like bouncer for nightclub.

Even when Chelsea bring Sam Kerr for second half — as per “make we equalize by force” — Everton still lock shop.

Chelsea nearly score for added time — woodwork reject one, and Everton even clear one ball wey don dey find net.

But the Toffees hold body, secure their first win after eight matches, and burst Chelsea first league loss under Sonia Bompastor — scatter the historic 585-day unbeaten run.

Yes o, almost two years don waka without loss… until Everton knack dem.

Payne & Co. Fit Brag Now

Na Everton be the first team wey don beat Chelsea for WSL since Liverpool do am back in May 2024.

Payne and her girls fit raise shoulder small — dem don do wetin no be anybody mate. Na so football be: today you be lion, tomorrow person fit cage you.

You like this gist abi?
Oya, we go like hear from you. Help us drop small comment for the box below!

Last Updated on December 8, 2025 12:12 pm by Hitvibz Media