Eric Chelle no hide im vex after Super Eagles B chop 1-0 loss for Senegal hand for their first CHAN 2024 Group D match.
Di head coach no sugarcoat anything — him yan as e be, say na one small mistake cost dem di match, na weytin hitvibz dey yan be dat.
Senegal Use Hungry Spirit Take Show CHAN Eagles Pepper
As di match finish, Chelle hail Senegal wella, say dem play with more fire pass Naija boys.
“Senegal play pass us. Dem put more ginger and energy. For me, e dey normal. Dem deserve di win,” na so im talk.
Chelle talk say im boys no fit match Senegal for body or even mind. He point say na one mental wahala make dem lose.
“For second half, na we dash dem di goal. Small mistake wey we make. But e dey normal, because we never even enter di match proper. Maybe na mind, or maybe dem fear something,” he talk.
Eric Chelle Tell CHAN Eagles Make Dem Reset Their Brain
E get one small period wey Super Eagles play better ball – hold ball, create chance – but e too late.
“For like 20 minutes, we play better ball, create chance to score. We dey keep ball,” Chelle yan.
But he say no be only to play ball — dem need strong mind and more ginger for attack and defense.
Im still dey shout say dem gats reset their brain sharp sharp before dem play Sudan and Congo.
“We gats get more ginger to attack, and defend well. Even though dem beat us for every tackle, sometimes our defense still try. But truth be say, na that one mistake kill us.”
Super Eagles Gats Wake or Go House
Looking front, Chelle talk say make dem no repeat the same mistake again. If fear still dey their mind, dem go use leg waka go back Naija.
“If we play like this again for next matches… Na Nigeria we go return.”
He remind dem say to wear Nigeria jersey no be beans — e carry pride and big responsibility.
He still respect Senegal, say dem be big team. But he talk say make dem face di tournament one match at a time.
Chelle also hail CHAN 2024, say di energy and level of play high well. Di pitch good, but na inside your head di real match dey.
“Di tournament don start well… plenty solid teams, everybody dey hungry to ball. Di pitch condition na correct.”
Last last, Chelle talk say CHAN Eagles no get time to dull again — play or pack go house.
You like this gist abi?
Oya, we go like hear from you. Help us drop small comment for the box below!
Last Updated on August 6, 2025 7:05 am by Hitvibz Media
Stay connected