Naija pikin dem no dey carry last at all! For dis year Gothia Cup wey dey happen for Sweden, three Nigerian team — Beyond Limits FA, Sporting Supreme, and Nigerian Eagles — don carry joy enter final and semi-final level for dis better football show.
From gbim gbim goal dem to penalty wey hold person chest, our boys show say Naija no dey dull for world football mata, na weytin hitvibz dey yan be dat.
Beyond Limits FA Knock Right to Dream Komot After Hot Penalty Wahala
Beyond Limits Football Academy don enter B17E final of Gothia Cup 2025 after dem nack Right to Dream for penalty — 4-2 na how e end.
And make we no forget say Right to Dream na five-time champ before.
The match wey shele for SKF Arena na one real wahala — Musa Imran waste no time as e score sharp sharp for 5th minute.
But kasala burst for 55th minute when dem give Abdullahi Abubakar Bolakale second yellow card — na 10 men remain for field.
Na just one minute after dem red card am, Ghana boy Kouakou Arthur Israel Oume come level am — 1-1.
But Beyond Limits no gree fall, dem hold body reach penalty and finish work.
Na ASEC Mimosas go face dem for final for Gamla Ullevi. Musa Imran still dey lead as top scorer with 4 goals.
Dem don score 20 goals and only chop 3 — sharp defence, mad attack!
Sporting Supreme Run Fire Enter B18 Final After Plenty Goal
For another hot run, Sporting Supreme FC no slack at all. Dem don qualify go B18 final after dem play fire football back-to-back.
Quarterfinal na Naija vs Naija as dem jam Mailantarki Care Sport FC. After Ebrima Manneh and Adagharagba Okiemute Godstime score for both sides, e end 1-1.
Na penalties settle am — Sporting Supreme win 9-8 for that heavy shootout.
Dem no stop there — dem clear Lostock St Gerards 4-1, then carry hammer nack Onsala BK 6-0 for semi-final.
Final go shelle against Varbergs BoIS FC for Gamla Ullevi too.
Nigerian Eagles Still Dey Fly High for B16
Another Naija team — Nigerian Eagles — dey fly like jet for B16 category.
Dem start tournament with 3-0 demolition of Nacka FC — Shamsu Mustapha score hat-trick sharp, and the opponent collect two red cards join.
Round of 16, dem clear Josh Evans Soccer School 4-2 — Mustapha and Fawaz Salami each score two goals.
Quarterfinal? Na tight 3-2 win over Stjarnan 1 — Salami and Ezekiel Oshofowokan deliver again.
Now na Lørenskog IF 1 dem go face for semi-final wey go happen for Bravida Arena. If dem win, na another final for Nigeria again!
No doubt say this year Gothia Cup na green-white-green all the way. Naija youth ball dey shine — bold, sharp, and ready to take over the world!
You like this gist abi?
Oya, we go like hear from you. Help us drop small comment for the box below!
Last Updated on July 19, 2025 8:11 am by Hitvibz Media
Stay connected