Matchday Four for di 2024/25 NWFL Super Six bin hot well well, as action full ground. Everything start with one strong South-South derby between Edo Queens and Bayelsa Queens—two ogbonge teams wey dey chase title serious.

Edo Queens still dey waka for title lane as NWFL Super 6 dey catch fire

After dem knack Naija Ratels 2-0 for di last match, Edo ladies show say dem no come joke this time, Hitvibz reports.

Bayelsa Queens self enter di match with better form—dem don beat Rivers babes and Remo Stars Ladies, plus draw 1-1 with Nasarawa Amazons.

But na babes wey dey from Benin wey finally smile last, as dem manage knack Bayelsa Queens 1-0 for one gbasky match for Remo Stars Stadium for Ikenne.

Na Goodness Osigwe score di only goal just before halftime, and that one na the winning goal wey burst Bayelsa Queens unbeaten run for this Super Six.

Coach Moses Aduku and him girls hold ground well for second half, and this na their second win for the playoff—wey still give dem hope say dem fit still hold onto di NWFL Super 6 crown.

Rivers Angels finally break jinx for Super Six

For the second game, Rivers Angels jam Naija Ratels. This match na more for pride than say dem still dey eye title.

After three matches wey dem only get one point, Rivers Angels dey hungry for better result.

Na only 25 minutes e take before dem show face—Titilayo Aweda score before halftime make e 1-0.

Later for the match, Mary Moses add another goal after one sweet free-kick from Catherine Kenneth.

The 2-0 win na the first time Rivers Angels go win for this Super Six, and e give dem ginger as dem dey prepare for final games and FA Cup match against Ibom Angels next week Saturday.

Even though na only two matchdays remain, Edo Queens still dey serious for the title race. Rivers Angels go just try finish strong and use the win hold body small, as this year no be their own.

Final match for the day na Nasarawa Amazons vs Remo Stars Ladies

Both teams na title chasers and dem no wan drop point at all.

Before di match start, na only one point separate both of them, so everybody dey expect better wahala.

Nasarawa Amazons don dey do well for playoffs—dem never lose with two wins and one draw before this match.

Remo Stars Ladies start dem Super Six journey with two back-to-back 1-0 wins against Edo Queens and Naija Ratels. But Bayelsa Queens stop their shine with 2-0 beating last match.

As everybody dey expect hot game, the match end goalless—no goals, just strong legwork and tensed vibes.

NWFL Super 6 never finish o, and as e be, better gbas gbos still dey come for the remaining matches.

You Like this post abi?
Oya, we go like hear from you abeg. Help us drop small comment for the box below!