Celtic don show say dem no dey play for transfer market. Dem don announce say Super Eagles striker, Kelechi Iheanacho, di “Senior Man”, go wear their green and white jersey for one-year deal.
Na only small wahala remain – international clearance. If tins set, na goal machine dem don pack, na weytin hitvibz yan be dat
Dem even add option to extend am one more year. Omo, no be beans! Celtic dey bet on man wey don already chop trophy for England and knack ball for Europe big stage.
Kelechi Iheanacho Carry Plenty Experience Enter Parkhead
See ehn, Iheanacho no be small pikin for football. At 28, the guy don carry CV wey fit intimidate person.
Na for Manchester City he start, spend two years, collect League Cup medal. Sharp striker wey sabi finish chances and dey always run like say na last bus he dey chase.
Fans love am quick-quick.
After City matter, na Leicester City snap am up. Over 200 matches, Rodgers coach am well-well, and together dem knack FA Cup for 2021. That one no be small glory.
Later, 2024, Iheanacho waka go Sevilla, before Middlesbrough carry am on loan for Championship. The guy still dey hot.
For Naija jersey, no talk am twice. Nearly 60 caps, AFCON silver medal 2023, and he dey among the sharp heads wey ginger Super Eagles reach final. Senior Man na certified baller.
Rodgers Dey Smile Like Person Wey Win Lotto
Brendan Rodgers dey reason say na jackpot he don hammer. Na him coach Iheanacho before for Leicester, so e no dey guesswork.
Hear am: “I sabi Kelechi wella. This guy na baller. He get skills, power, energy, everything wey striker need.”
Rodgers still add: “He go love play for Celtic, and fans go gree with me sharp-sharp. Senior Man dey inside him peak, na big signing be this. He go contribute die.”
With Rodgers dey press confidence and Senior Man dey hungry for goals, omo, Celtic attack fit just dey scatter like generator wey choke fuel.
Defenders for Scotland gatz shine eye, because if Iheanacho dey in mood, na wahala full ground.
This season ehn? Plenty things go happen!
You like this gist abi?
Oya, we go like hear from you. Help us drop small comment for the box below!
Last Updated on September 3, 2025 12:26 am by Hitvibz Media
Stay connected