Reekado new album don help the bobo bounce back for music game and na em long-awaited second album wey e name “The Game Needs You” — na sign say baba still dey for the matter.
From the first beat sef, you go know say this album wan scatter ground — but e really get that power?
Reekado New Album: Collabo, Party Groove & Small Soft Feelings
Almost 10 years after e first blow, Reekado dey show say him still wan chop for the big boys table. E carry people like Phyno, Lil Kesh, Terry Apala, Skiibii, Winny and Kashcoming join body make the album sweet small, na weytin hitvibz dey yan be dat.
Tracks like ‘Mukutu’ and ‘Glamorous’ (wey get Mayorkun) still dey there — na correct party jam and love vibes em use scatter the album.
But the real question be say, this Reekado new album get that ginger wey go make you replay am next week or next month sef?
To talk true, “The Game Needs You” be like say Reekado dey hold tight to him party style but e dey force am small to show say e still get am — so e come be mixture of correct songs and anyhow songs.
E start the album with “Freestyle” — na pure Amapiano groove to make you dance. No deep talk, just flexing and club vibe all through.
Next one na “2WFL” with Winny, get small Mexican sauce and Winny voice make am fresh — you fit feel say na even Rihanna dey sing with Reekado Banks.
But come wahala enter the album small when you jam song like “Maami” — that one just sound somehow for ear and the hook sef na wah, e fit no get replay value oh.
Make I no.lie, if you hear am, you sef go know — e loud, scatter scatter, and for me, e no suppose dey that album at all.
And “Mukutu”? Dat one sef na pure TikTok jam — people go just use am dance for short videos, shake body, but to sit down listen am back to back? E fit no happen oh!
Small Up, Plenty Down for Reekado New Album
No be everything fall hand sha. No fear! That track with Lil Kesh, “Biliki,” na the hidden banger — cool jam to relax with your guys, babe and one cold drink.
Lil Kesh kuku carry em energy come and e help the track shine well.
If no be Lil Kesh own vibe, e for don join the forgettable list, because this album really need that kind song.
Another sweet one na “Glamorous” with Mayorkun. Mayorkun ginger the jam, e carry life put for where Reekado solo tracks dull. Beat smooth, lyrics simple, you fit play am for babe wey dey your mind.
“My Woman” wey get Phyno try add small Igbo rap but e still drown inside similar beats and same old talk.
Production side, Don Jazzy own work for “December (So Beautiful)” try warm heart with sweet lines and romance vibe but after 2-3 plays, you fit drop am.
Same thing for “Dangerous” and “Katalina” — Reekado pour him mind out but e no land well, e no get that strong replay vibe.
Last last track “Bro Bro”, na thank you vibe with mellow Amapiano beat. E calm and e good say e end am like that after all the repeat party sound — e show say e still get human side.
Bottom line be say: Reekado new album “The Game Needs You” wan prove say em still fit run party, but too much average beat, empty hook and lines wey you fit forget just hold am back.
If you wan pick one jam wey you fit dey put on repeat, hold “Biliki” — na the only one wey sure for cruise.
For me oh! I go just rate dis Reekado new album 4.5/10 — e go hold your dance floor small, but by next weekend you go don move on from the album.
You like this gist abi?
Oya, we go like hear from you. Help us drop small comment for the box below!
Last Updated on July 12, 2025 8:36 am by Hitvibz Media
Stay connected